Сирие зауэм Тыркум щыщыу ц1ыху 74 хэк1уэдащ.

 Сирие зауэм и хуэмэбжьымэм Тыркур куэд щ1ауэ егъэхыщ1э, ик1и абы къик1а ц1ыху мин бжыгъэхэр Тыркум щагъэхьэщ1э. Гугъуехь куэд абы къэралым къыхуихьащ. Тыркумрэ Сириемрэ я щ1ыгъунапкъэхэм деж хабзэншэу к1уэц1ырык1ыну хуейхэмрэ, хабзэ хъумэ къулыкъухэмрэ я зэудэк1ыныгъэхэри щ1эх щ1эхыурэ къохъур. Абы Тыркум и ц1ыхуу хэк1уадэхэри мащ1экъым.

Джумхьуриет Хьэлк партиси зи ф1эщыгъэц1э Ц1ыхубэ республика партым и къуэдзэ Танрыкулу Сезгин,Сирие щ1ыгъунапкъэм деж къыщек1уэк1 къэхъукъащ1эхэмрэ, абдеж иджыпсту дагъэувэ блыным, ц1ыхубэм я шынэгъуэншагъэм  теухуауэ парламентым къыщита упщ1эм и жэуапхэр Тыркум Хамэ къэрал 1уэхухэмк1э и министр Давутогъулу Ахьмэд  иритащ, Министрым мыпхуэду жи1ащ: “Сирие зауэр здек1уэк1 Тырку щ1ыгъунапкъэ и лъэныкъуэмк1э къик1 фочышэхэмк1э, ит1анэ Сирием епха терор къэхъукъащ1эхэм, абы нэмыщ1 хабзэншэу щ1ыгъунапкъэхэм к1уэц1ырык1ыну хуей ц1ыхухэм я зэранк1э нобэм къэсыху ди ц1ыху 74 хэк1уэдащ, ц1ыху 337 у1эгъэ хъуащ. Сирие ди щ1ыгъунапкъэр шынагъуэншэу щыдгъэтын щхьа абдеж иджыблагъэ щ1эддзауэ блын дэдгъувэм къинэмыщ1ауэ, сыт щ1апхъэу щытыми тщ1энущ.“ Жэуэ.

1уэхугъуэм теухуауэ и гупсысэхэмк1э Хуитыныгъэ радиом и микрофоным къедгъэпсэлъащ Токат къалэ щыщ Уэргинокъуэ Тауфун, “Ц1ыхухэм я гъащ1эр пудкъым. Япэрауэ къэралым езбы и ц1ыхур апхуэдэхэм щихъумэн хуейщ. Иджы Сириемрэ Тыркумрэ я щ1ыгъунапкъэм блын дагъэувэр зэхэтхащ, ахэри сэбэп хъунущ. Сэ мыри къыхэзгъэщыну сыхуейт, ди Адыгэхэри яхэтщ а гузэвэгъуэм. Зауэм кырихужьахэм языныкъуэр  ди хэкужьым к1уэжахэщ. Ар тэмэмщ, сэ ахэм пщ1э яхузощ1. Ауэ абы к1уэжыну хумейхэр зэхыдохыр, 1ейуэ си жагъуэ мэхъу.

Анадолу ажансы зиф1эщыгъэц1э Тыркум и къэрал хъэбар гъэ1ум къызэритамк1э нобэр къыздэсым Сирие зауэм и хэкум ирихуахэм я бжыгъэр мелуанит1ырэ ныкъуэм нэсащ. Ахэм ящыщыу зы мелуаным еблагъэр Тыркум щы1эхэщ.

Емуз Баязыт, Хуитыынгъэ радио, Тюркие.